| |
|
Menu Principal
|
 |
|
Langues
|
|
|
|
| |
|
|
|
|
Ua tià mai tāua i nià i teie fenua mā to tāua māramarama e tō tāua ìte. E taata tāua, e varua tō tāua, e māramarama pāpū tei roto ia tāua.
E ti'a ānei rā ia tāua ia faarii na mua roa i te mea ē e māramarama to roto ia tāua ? Eère tāua i te mea faufaa òre. Eère tāua i te paa. Eère hoì tāua i te 'ānimara.
|
E aha tāua i tuuhia mai ai i nià i te tiàraa taata ? 'Oia hoì, èi tiàraa hanahana aè i tō te mau mea atoà o teie nei ao. Tei nià tāua i te rāau tupu, te 'ānimara e nee noa, te 'ānimara e horo noa, te 'ānimara e hopu na raro i te moana, te 'ānimara e rere noa. Aita tāua i hāmanihia mā te 'āvae puaa-horo-fenua a horo vitiviti ai tāua mai tāua 'ānimara horo vitiviti. Aita tāua i haahia èi poa ià, a àu ai tāua mai teie mau 'ānimara e hoehoe na raro i te ìriatai. Aita hoì e pererau tō tāua a rere ai tāua mai te manu te huru.
Ìnaha ra, te faahoro nei tāua i te pereoo, te paoti nei tāua i te pahi, te ori haere nei tāua na nià i te manureva. Na teie mau mea e faaìte nei ia tāua tei nià ihoā tāua i te mau mea atoà o teie ao.
Ua àtutu te parau, aita tāua te maòhi i fatu i te māramarama. E aha ia teie manaò i fā mai ai i teie ao no te haàfaufaa òre ia tāua. No te aha hoì tāua i manaò ai i te reira huru nō tāua, e aha hoì te faahiahia i roto i te reira huru manaò ? Na vai tāua i haapii i te reira mau huru manaò, e aha te tumu tāua e vare ai i tāua mau parau e haere mai nei e tuu ia tāua i te vāhi pōuri.
Ua rau te faatororaa e vai ra, ua rau te faaturoriraa i roto i teie ao, ua moèhia ia tāua i to tāua tiàraa taata tupu, taata faufaa, taata varua.
Ìnaha hoì, te vare noa ra tāua eère tāua i te mea faufaa, nāhea teie huru manaò e matara ai, e taa roa atu ai i tō tāua huru mau?
A taiò i te mau manaò e vai ra i nià i teie tahua. E rave rahi mau parau i faahitihia e TKNui, o vau iho nei.
O vau te pii nei ia ù iho nei o TKNui, e iòa pii i haapotohia no teie iòa o Tahuŋa Korero Nui. Teie te tātararaa. E tahuà vau. E parauhia ai au i to ù iho reo e TAHUŊA. Te auraa o teie taò e taata māramarama ia. Ua haapii i te mea a ō mai ai te ìte i roto ia ù. Ua faatāmāa vau ia ù i te māa no te māramarama. Ua haere au i te haapiiraa, e rave rahi matahiti vau i tià ai i te fenua ātea no te àpo mai i te ìte, a māramarama ai au i nià i te mau mea o teie ao. Te taahīraa mātamua teie no te fatu mai i te māramarama. Mea ātea te toe nei. A pee noa mai na e ìte atu òe i te reira.
E taata òrero vau. E parauhia ai i to ù iho reo e KORERO. Te auraa ra o te taata ia o tei 'ī i te māramarama e o tei itoito i te hāmama i tō na vaha, no te parau i te parau no roto mai i to na māramarama. Eère ia no te mea e māramarama hau aè tō ù. E māramarama ra tō ù, tià ra atu ai. Nā tātou e faatitiàifaro, e autaui i te manaò, tō ù māramarama ia tuàti atu i tō òe ra, ua hau atu ia te māramarama e roaa mai, a hau atu ai to tāua ìte, i muri iho, ua Nui roa ia tāua.
NUI, te taò e pūòhu nei i to ù iòa. Ia parauhia e NUI, te auraa ra ua tāhiti ia te faahiahia. Parau mau e riro ihoa tātou i te pohehae e te hinaaro i te pātia i teie huru taata e faatietie nei ia na ma te parau e "Nui vau". E tiàraa teie no te Arii, no te feia tei 'ahuhia i te mana. Eère roa atu vau i te taata mana, eère au i te taata faahiahia, tiàturi mai. Ia tāpiri au i tō ù nau iòa nei i te parau NUI, te auraa ra, ua horo vau i te tahi tiàraa e maraa ia ù. O te reira noa te mea a NUIhia ai au, ua niu maoti au ia ù i nià i te tiàturiraa e te faaroo.
Tātararaa i te tāatoàraa o teie iòa piri. O TKNui - TeKa Nui - o te teà ia o te parau no roto mai i te māramarama. Te taa mai ra? E TEKA vau i te reko NUI.
Èi aha tāua e feruri noa. A taiò e a māramarama. Teie huru faanahoraa iòa, e faanahoraa matauhia e te mau tupuna. Mea huru taa è tā rātou faanahoraa i te mau mea e hāati nei ia rātou. Te vai ra terā peu ia ratou ia hiò òe i te mau mea o teie ao "èiaha e moèhia ia òe e Atua tei rahu i te reira". Ia hiò òe i te tahi mea, a feruri mā to varua, èiaha e tuu noa i te rima i nià a pohe òe i te maì. Ia vai te faatura i roto ia òe i te mau taime atoà, a roohia òe i te tahi tapu e ìno ai òe. Aita hoì tāua i ìte i te auraa o te mau mea atoà".
Parau māramarama, eère anei? Eère ra teie i te parau no te māramarama o te huru nunaa e àtutu nei to na parau i teie tau.
Teie ā te tahi hiòraa. Ia haafatu te tahi o tō tātou mau māòhi i mutaa iho ra i tō na fenua, eìta o ia e tuu noa i te tapaò moti, ua oti atu ai. E faatara o ia i to na àià mā te 'ārueraa i roto i tā na parau, mā te tūàti i te mau mea atoà e ìtehia ai te hanahanaha o tō na fenua. Ua ìte tātou i te reira peu, e parauhia nei te "paripari fenua". A taiò mai i te faanahoraa o teie peu no māòhi roa mai i nià i teie rāveà 'āpī e parauhia nei te tahuauira. Ua faatara vau i to ù mouàuira o AORAI, to na vai o Vaitārere, tō na òutu o Hitimure òre, tō na tahua 'ōreroraa o T'OMA, to na tahuà tiààu o Oviri i te puaavao, e tae noa atu i to na hūaai. Tei ò nei teie paripari fenuauira a tāumi i tei iòa AORAI.
Māramarama taa è ihoa tō te mau tupuna, eère anei ?
E aha tāua e faaturori ai i to tāua manaò, ma te haafaufaa òre i ta tāua iho, i to tāua iho. Aita tā te papaa e faanahoraa mai teie te huru. Ua moè roa rātou i raro aè i te àuri, te ùrāna e te tāpau o ta rātou mau mauihaa. Aita e varua, aita e navenaveraa, aita e faahiahia hau atu i te faahiahia mauihaa. Aita mau ā e faaturaraa i te Atua, ìnaha aita e àrueraa to roto. Ua rahi ìno roa te faatietieraa i te iho taata, te hanahana rā aita i faahoìhia i te vahi no reira mai o ia. Òia hoì te hanahana, e māa ia na te Atua. Eère te reira i te māa na te taata. A hiò na tāua i teie mahana, ua viivii te taata i te àmuraa i te māa e tano noa i te Atua. Ua faarahi te taata ia na, ua ùme ia na i te fāito o te Atua. Ua tāhape roa 'o ia i te moti o te taata e ua àhu i te àuro, ua parahi roa o ia i nià i te terono o te Atua.
Àhiri na ra, e a ù hoa. Tei hea māramarama o tā òe e tītau nei, a faatiho roa atu ai òe ia òe i mua i te aro o te Atua. O òe te taata o tā na i tuu i nià roa i te mau mea atoà. Ua 'ōrure òe i te hau o tō Atua no te faanaho mai i te pohe e te tāhitohito i roto i tō òe oraraa. E aha teie māramarama o tā òe e hinaaro nei i te faatāmāa i ta òe huaai.
Ia NUI mau ā òe, e tià ai. O te reira ihoā te parahiraa tā te Atua i faanaho mai no tāua. O òe te tamaiti o tā na i poihere a tuu roa atu ai o ia ia tāua i nià i te mau mea atoà. Teie nei ra, aita tāua i NUI. Ua NOA noa tāua. Ìnaha hoì, no te NUIraa mea tītauhia te haèhaaraa, te faatura e te māramarama o te varua.
Mauruuru i te taiòraa mai!
|
|
|
|
| |
Transmis par: TKNui Actif Mercredi 15 Avril 2009 - 22:59
|
|
|
|
|
| |
|
|
|
|
|
|
